بقلم نجلاء خليل
البنت المغزولة خيوط من نور
جت لي وحكيت لي الحدوته
من قبل ماتوصل توته توته
أو تسألني عن حكايتها
حلوة كانت أو ملتوتة
أنا كنت سرحت ف ضفايرها
واحترت ف رقة فستانها
ولا عينيها ولا ايدها المتحنية
ولا ف ضحكة متبقية
أو روح خطفتني ولفتني
درت ف دنيا غير الدنيا
البنت المغزولة خيوط من نور
كانت صافية
كانت دافية
كانت ترياق
زي ملاك نازل ليا
وبقلبي سمعت الحدوته
وكلامها ياناس أثر فيا
وأنا طول عمري بحب الصدق
وبحب الروح الشفافه
وبحب النسمة الهفافه
وبحب الطهر
ماهو أصل الكدب
أسود وغشيم
والقلب الصادق
حلو وسيم
والبنت المغزولة خيوط من نور
فضلت تحكي
وتقول أسرار
وخدتني لبحر
زرعتني
ف قلب محار
سألتني عن معنى الحب
وجاوبت أنا بس
بصوت مخنوق
الحب ياحلوة زي الطوق
نرميه في البحر
يانجينا وياخذنا لبر الشوق
يا يغرقنا ف حلم
وهف ف لحظة نفوق
البنت المغزولة خيوط من نور
ضحكت بعيونها الحلوة
وبانوا الغمازتين
قالت
افتح قلبك لنصيبك
منه حاتروح فين
حب الدنيا تحبك
عيش
دور على نصك
وف قلبك خبيه
وسابتني وجريت
وأنا دوبت وحنيت
لكلامها وصوتها جريت
خافت جريت
وسابتنى وحيد ف الحدوته
البنت المغزولة خيوط من نور
